ليلة أحد

عقاب ليلة أحد ساكتة
وحيوطك في قلبي بايتة 
مع تبخنيس لمطر 
نتشهى نمشيك مالTGM لباب بحر 
ونزيد نكتبك عقاب سطر

وكي يقتلني الشر 
نقسم معاك نسمتك بالشطر 
وناقف معاك في كل محطة 
من لافايات للڨمبطّة

نعرفك نساية 
وماتتفكرش قداش فكيتلي من عام مالعمر 
نعرفك تعرفني ولدك ومانسلمش فيك 
ومرشوم على حيوطك وزناقيك الخايخة 
مع ولادك الي تخيط في شوارعك شايخة 
مالباساج لمفتاح سعد الله 
للavenue وباب منارة 
والقسم عاللله
ملّي شاريك والي بايعك
ڨلبك ڨسى ولى بارد اكثر من شتاك
وغناك ماعادش يتسمع من كثر بكاك

ونشعلو سيقارو على دروج المسرح 
نكمي ليا وليك وفي جواجيك نسرح 
علاش تبكيني كل ماشتهيت نزهى ونفرح ؟
تي أنطق حتى حرف يرتح

توحشتك وتوحشت نقسم الوجع معاك 
ونرجعلك وما نسيبك ولا نخطاك

ليلة أحد
وماينسيني فيك حد 
هدرة عقاب ليل تتحكى 
وكلام وحش تجبد 
فرفط في كنيني 
وكي مالقاكش رجع لبد

هاني مشيت وماشاورتش 
هاني حبيت ننسى وما نجمتش 
هاني حبيت نكرهك وماتعلمتش

تي كيفي كيف الي عشقك وما فهمش كيفاش 
كيفي كيف ولادك الي تبلع فيهم بالواحد وماتستناش 
كيفي كيف كل واحد سألك وماعرفش علاش

توجع وتقتل 
تتحب في الظلمة 
وماتتراش

حكاية بدات وماتوفاش 
وقد ماتحب تكرهني فيك 
نقعد نعشقك ومانترباش 
يا بيّة ... يا شبعة الي ماكلاش 
وتنهيدة إلي سكت ماحكاش

[Amine.G]

ليلة أحد by Amine Gallah

https://soundcloud.com/amine-gallah/5xpksyrc5ejh