ماصاب

مصابني العين الي ماشافتك وعشقتك 

مصابني اليد الي اشتهات زنودك ومامسّتك

مصابني عقاب حمّيرك عالكاس الي سكرت بيه 

مصابني بعد التعب الفرش الي عنقك كي اتكّيت عليه

مصابني عضيتك من شفايفك وشربت منها كيسان

مصابني تشهّيتك تتكّى على كفّي وقلبي عريان

مصابني الشطر الي ما يهونش بش يكمل 

مصابني لعمر إلي مايخونش ويحمل 

مصابني ولدك الي يمرجك كي يقعد يسأل

مصابني بوسة خالة في رقبتك تتباس

مصابني الشهوة على صدرك والشيخة في الراس 

مصابني ڨمرة الليل الي تونّسك وعاملة عليك عسّاس

مصابني غاطس فيك من عينيك لصوابع ساقيك 

مصابني روبة النوم الي تحرّم عليّا حلاوتك وتغطّيك 

مصابني راحتك مالهموم إلي ترتّحك وتنجّيك 

مصابني بغزرتي نهرب بيك ومن عيون الناس نرقيك

مصابني حرامك وشيطانك الي يتربع بيناتتا كي نجري ونجيك 

ومصابني مغروس فيك 

كل مانشتهاك حد مايسالني فيك

نلبسك وتلبسني 

نعشقك وتنفسني 

نمسك بش تتنفسني

تتدكك عليا 

وبتعنيقة تغفّصني

ومصابني ضايع فيك بش نلقاك 

نرقد بيك وفيك وعليك ومعاك

وماصاب نلعن الي بلاني بيك 

ومعشوقة في جاشي خلاّك

ماصاب نكوي القلب إلي في وكرو رماك 

وتبلى ... عشقك ... وزاد هواك

وماصابك كي غناية نزنّها 

نبداك ... مانوفاك

ونتكفّن بشعرك

وأنا ممدود حذاك

وكي تڨرس تلقاني غطاك

ونسبّح لربّي 

عالزين والسّر إلّي عطاك

وماصاب نفركسك ونلقاك فماش ماننساك

وماعاد نمسّي ونصبح على شمس سماك

ومحال نخطاك حتّى وأنا مانيش معاك

ومصابني عقاب لكلام إلي بداك ومزال ماوفاك 

[Amine.G]