يا شيطان ريض وماتعياش
ستنى الليل يليل وارجع ماتغداش
شعل الشهوة وماتتنساش
تفكرني نبوسها
من كل تركينة متخبية
جاشي عليها ما حكاش
زنودها لويز ومرجان
ضحكتها دوى للبعد تنسي لمحان
وبرى يا زمان
وايجا يا زمان
وهي هي
ماتبدلتش للوان
الشفة حمرة دم
ولكحل في شفرها
وحدو حكم
الي على غزرتها
لازم نتفطم
ونتفكر الشيخة
وننسى الهم
عيب
ما يجيش تلم
والي خلق لوجيعة
وقت سكرة لوحم
مانريضش ومانبراش
منها ومن دلالها
الي ختار يتبختر
وما حكاش
مش من توة
ومش من اول غزرة تنفست
ومش من اول غصرة نساتني لكلام
تكبيت وتكربست
وفضحني غرامي
عقاب منامة قسمناها
هبلة وشنعة سميناها
يلعن هواها وبلاها
ويلعن الي حسها وما سماها
غرام
تكتب
بحروف لكلام
تحت فتيلة
تونس الظلام
كيف ما تزيليفة
تقشعرني
وقت نمسها
وقت نحسها
وقت نرصها
ولملايكة
والشيطان
يتعاركو
ولحلال
يتحرم
ويسبها
ونترمى
غشير
يفركس في عبها
ورزينة عليا
كي نقول نحبها
وصعيب ننساها
ونخطاها
ونسهر لياليا
نستناها
فماش ما تهفت
وتنحي كسوحية الراس
ونرميها على صدري
ونترشف
كل شبر فيها تخلق بش يتباس
بالك تفهم
الي هي الساس
الي هي البلوة في الجاش
كي تفهم هي
توة وحدو الشيطان يسكت
وما يعياش
ويرزيني في عمري
الي معاها ماتعاش
لكلام أقوى
كي ما يتحكاش ومايحياش
ولغرام ماوفاش مدامو ما يتنساش
#يزيها_ويزيني
#ويزيه_التخربيش_قداش_برباش
[Amine.G]